काठमाडौं : सत्तारूढ पार्टी नेकपामा भित्रभित्रै प्रधानमन्त्रीको केपी शर्मा ओलीविरुद्ध अविश्वासको प्रस्तावको तयारी भएको चर्चा चलिरहेको बेला प्रधानमन्त्री ओलीले आफूले कुनै हालतमा राजीनामा नदिने अडान लिएका छन्। प्रधानमन्त्री ओलीले आफू कुनै छलछामबाट नभई व्यापक जनसमर्थनमा पदमा पुगेको भन्दै आफ्नो राजीनामाले देश थप बर्बादीतिर जाने दाबी गरेका छन्।

काठमाडौं महाराजगञ्जस्थित शिक्षण अस्पतालमा बुधवार मनमोहन सेन्टर एनेक्स भवन उद्घाटनका क्रममा प्रधानमन्त्री ओलीले वर्तमान परिस्थितिमा राजीनामा दिनै नमिल्ने धारणा राखेका हुन्। ‘प्रधानमन्त्रीको स्थानमा आएको मेरो रहरले होइन । जनताको आवश्यकता र समर्थनले हो । व्यापक जनसमर्थनबाट प्रधानमन्त्रीको पदमा पुगेको हुँ । मैले राजीनामा दिनु भनेको देशलाई बर्बादीतिर जान दिनु हो,’ उनले भने, ‘त्यसकारण म राजीनामा दिनेवाला छैन । तपाईंहरू ढुक्कले काम गर्नुस् ।’

प्रधानमन्त्री ओलीले सञ्चारमाध्यमले आफ्नो राजीनामाको हल्ला शुरू गरिसकेको भन्दै सरकारका जुनसुकै कार्यमा पनि आलोचना गर्ने केहीको आदत रहेको आरोप समेत लगाए ।

यसैबीच, नेकपाका नेताहरूले पार्टीभित्रको विवाद छताछुल्ल भएको भन्दै व्यवस्थित छलफलका लागि बैठकको माग गरेका छन् । पार्टी विवादका विषयमा अध्यक्ष पुष्पकमल दाहाल प्रचण्डले राखेको प्रस्ताव अर्का अध्यक्ष एवं प्रधानमन्त्री केपी ओलीले अस्वीकार गरेपछि नेकपा विवाद उत्कर्षमा पुगेको हो ।

गत शनिवार अध्यक्ष प्रचण्डले अर्का अध्यक्ष ओलीसँग पार्टी विवादका विषयमा सचिवालय बैठक राखी छलफल गर्नुपर्ने धारणा राखेका थिए । तर, ओलीले तत्काल बैठक बस्न सम्भव नभएको भन्दै अब एउटै पार्टीमा बस्नसमेत नसकिने र आ–आफ्नो बाटो तय गर्न सकिने अभिव्यक्ति दिएपछि पार्टी विवाद थप उत्कर्षमा पुगेको हो ।

दुवै अध्यक्षका अभिव्यक्तिले पार्टी फुटको संघारमा पुगेपछि राष्ट्रपति विद्यादेवी भण्डारीले नेकपाका उपाध्यक्ष वामदेव गौतमलाई मंगलवार भेट गरी नेकपाभित्र देखिएको पछिल्लो घटनाक्रमबारे जानकारी लिएकी छन् ।

भेटमा राष्ट्रपति भण्डारीले सत्तारूढ पार्टी विभाजित हुनु मुलुककै लागि घातक भएको भन्दै विभाजन रोक्न पहल गर्न आग्रह गरेको बताइएको छ । यसअघि दल फुटाउने अध्यादेशको बेला पार्टी फुटको संघारमा पुग्दा भने चिनियाँ राजदूत हाउ यान्छीको सक्रियताले पार्टी फुटबाट जोगिएको थियाे । ,आजको आर्थिक अभियान दैनिकमा खवर छ ।

तपाईको प्रतिक्रिया